Eccu una chjuca prisintazione par quelli chì sò intarissati d'un monte chì vo cunniscite forse : u Capu d'Ortu.
U Capu d'Ortu hè una cima di media altura (1294 metri) chì suprana u golfu di Portu, in Corsica Suttana, in la parte midiana di a Corsica.
A so particularità stà in lu fattu ch'ellu si trova à solu 2,5 chilometri da u mare (!). Si face chì a rampa chì ci cunduce hè bella arritta. Ci hè dinò da mintulà i pinzi chjamati " e Trè Signore" ghjustu accantu.
Ritratti stratti di "Corsica Muntagna" da A.Périgot, edizione Micca Nomi! (billissimu libru, a qualità di sta futtò hè stata vastata è ùn porghje micca una tistimunianza fidele di e futtò d'issu libru), è a siconda esce da "La Corse Des Montagnes" da C.Pujos, edizione Glénat. Quì dinò i ritratti sò di qualità più bona cà questu. Tutt'à dui saranu stati pigliati da a marina d'Osani (par u sicondu hè sicura)
Avà calchì viste d'issa cima da parechji lochi:
1) Da a girata ghjustu innanzu à Evisa. Hè in fondu, si vede dinò u Capu à u Monte à manca.
2) Da a strada di Seve. Si vede Cristinacce è u Golfu di Portu in Fondu. U Capu d'Ortu hè postu à manca, da mezu à i dui altri monti, vale à dì u Capu di Vitullu à manca strema è u capu à u Monte à dritta è chì hè quancianu.
3) Da e Conche, sopr'à Marignana, à u ciuttà di sole (in rialità si vede masimu e Trè Signore)
4) Da Evisa, incù u paese à u prima pianu, cù una vista imprissiunante da a so facciata livante.
5) Trè viste da Portu, à u pede di u Capu d'Ortu
6) Una vista da sopr'à l'antica minera di farru, sopr'à Marignana.
7) Una vista d'aviò. Hè u monte quancianu, u prima chì hè cintu da i nuli, à dritta. (solu a cima hè sopra)
8 ) Dui ritratti, micca di mè, pigliati da a cima di u Capu d'Ortu. (trovi in un situ fattu da Amiricani o Alimani, ùn mi ne avvengu più)
Par andà in la cima, si parte da u circondu di Piana. U slivellu hè di circa 800 metri, è accorenu duie ore à pocu pressu.